Raza Musani 
بغداد : عراق کے وزیراعظم علی الزیدی نے انکشاف کیا ہے کہ امریکی صدر ٹرمپ کو پیش کیے گئے جنگی منصوبے میں عراق کے راستے ایران پر زمینی حملے کا امکان بھی شامل تھا، عراقی اخبار ’’المدیٰ‘‘ کی رپورٹ کے مطابق علی الزیدی نے شیعہ سیاسی جماعتوں کے اتحاد فریم ورک کوآرڈی نیشن کے رہنماؤں کو بتایا ہے کہ امریکی صدر ڈونلڈ ٹرمپ کے سامنے ایران کے خلاف جنگ سے متعلق ایک منصوبہ پیش کیا گیا تھا، جس میں عراق کے راستے جنوبی ایران میں امریکی فوجی داخل کرنے کا ایک ممکنہ منظرنامہ بھی شامل تھا۔ الزیدی نے بتایا کہ انہیں اس خفیہ منصوبے کی بعض تفصیلات تک رسائی حاصل ہوئی ہے۔ منصوبے میں ایران کے خلاف کارروائی کے تین ممکنہ منظرناموں کا ذکر کیا گیا تھا، جن میں سے ایک عراق کی سرزمین استعمال کرتے ہوئے جنوبی ایران میں زمینی فوجی کارروائی کا تھا۔
رپورٹ میں یہ بھی بتایا گیا ہے کہ عراقی وزیراعظم نے کویت سے متعلق ایک ممکنہ ایرانی کارروائی اور اس میں عراقی مزاحمتی گروہوں کی معاونت کے خدشات پر بھی گفتگو کی۔ اسی اجلاس کے دوران علی الزیدی نے ایران کی حمایت میں کسی نئی امریکی-ایرانی جنگ میں شامل ہونے والے عراقی مزاحمتی گروہوں کو خبردار کیا کہ حکومت ان کے رہنماؤں کے خلاف گرفتاریوں سمیت سخت کارروائی کر سکتی ہے۔ اس سے قبل 5 نومبر کو امریکی صدر ڈونلڈ ٹرمپ سے ٹیلی فونک گفتگو میں بھی الزیدی نے واضح کیا تھا کہ عراق کی سرزمین کسی پڑوسی ملک کے خلاف حملوں کے لیے استعمال نہیں ہونے دی جائے گی۔
