Raza Musani 
تل ابیب : اسرائیل کے صدر ہرزوگ نے نیتن یاہو کے حریف سابق اسرائیلی آرمی چیف آئزن کوٹ کو حکومت بنانے کی دعوت دیدی۔ غزہ میں نسل کشی اور ایران جنگ چھیڑنے والے نیتن یاہو حکومت بنانے کی دوڑ سے باہر ہوگئے ہیں۔
اسرائیلی اخبار کے مطابق اسرائیل کے صدر نے کہا ہے کہ اگر حکومت بنانے کی کوششیں ناکام ہوئیں تو کینیسٹ کو توڑ دیا جائے گا اور دوبارہ الیکشن کرائے جائیں گے۔ نیتن یاہو نے مطالبہ کیا تھا کہ یونٹی گورنمنٹ بنائی جائے تاہم صدر نے یہ مطالبہ ماننے سے انکار کردیا۔ حکومت بنانے کے لیے درکار ووٹ حاصل کرنے میں ناکام نیتن یاہو نے دعویٰ کیا تھا کہ اسلام پرستوں سے اپوزیشن کا اتحاد اسرائیل کے مستقبل اور سیکیورٹی کے لیے خطرات کا سبب بنے گا۔
اسرائیلی صدر اسحاق ہرزوگ نے ملک کے سابق آرمی چیف اور اپوزیشن رہنما گادی آئزن کوٹ کو باضابطہ طور پر نئی حکومت بنانے کی ذمہ داری تفویض کر دی ہے، جس کے بعد انہوں نے وزیراعظم بنجمن نیتن یاہو اور ان کی دائیں بازو کی جماعت کو بھی اتحادی حکومت میں شامل ہونے کی پیشکش کی ہے۔
27 اکتوبر کو ہونے والے عام انتخابات میں کسی بھی بلاک کو واضح اکثریت نہ ملنے کے بعد، آئزن کوٹ کو اتحاد بنانے کے لیے 6 ہفتوں کا وقت دیا گیا ہے تاکہ وہ ملک کے طویل ترین عرصے تک وزیراعظم رہنے والے نیتن یاہو کی حکمرانی کا خاتمہ کر سکیں۔
2015 سے 2019 تک اسرائیلی فوج کے سربراہ رہنے والے آئزن کوٹ نے واضح کیا کہ وہ اسرائیلی معاشرے کے تمام طبقات کی نمائندگی کرنے والی ایک مستحکم اور یکساں حکومت قائم کرنا چاہتے ہیں۔
اسرائیل کے حالیہ انتخابات میں آئزن کوٹ کے چار جماعتی اتحاد نے 48 نشستیں حاصل کی تھیں، جبکہ نیتن یاہو کے دائیں بازو اور مذہبی اتحاد نے 53 نشستیں جیتیں، تاہم دونوں ہی 61 نشستوں کی سادہ اکثریت حاصل کرنے میں ناکام رہے۔
عرب قیادت والی جماعتوں نے تاریخی پیش رفت کرتے ہوئے ریکارڈ 19 نشستیں حاصل کیں اور نیتن یاہو کو اقتدار سے باہر کرنے کے لیے آئزن کوٹ کی حمایت کا اعلان کیا ہے، لیکن آئزن کوٹ نے ان جماعتوں کے ساتھ باضابطہ اتحاد تشکیل دینے سے فی الحال انکار کیا ہے۔ اس کے بجائے وہ الٹرا آرتھوڈوکس مذہبی جماعتوں اور لکود کے اراکین کو ساتھ ملا کر پارلیمنٹ میں اعتماد کا ووٹ حاصل کرنے کی حکمتِ عملی پر غور کر رہے ہیں۔
نئی حکومت کی تشکیل کی راہ میں کئی پیچیدہ سیاسی اور عسکری چیلنجز حائل ہیں۔ الٹرا آرتھوڈوکس مذہبی جماعتیں اپنے طبقے کے لیے فوج میں جبرًا بھرتی سے استثناء کا مطالبہ کر رہی ہیں، جبکہ آئزن کوٹ نے تمام شہریوں کے لیے یکساں فوجی سروس کو اپنی مہم کا حصہ بنایا تھا۔ مزید برآں، غزہ، لبنان اور ایران کے خلاف جاری جنگوں کے باعث اسرائیل کو بیرونی و داخلی محاذوں پر سخت تناؤ کا سامنا ہے۔
