امریکا نے اقوام متحدہ کی نمائندہ فرانسسکا البانیز کو ہٹانے کا مطالبہ کردیا

نیویارک : اقوامِ متحدہ میں امریکی نمائندے جیف بارٹوس نے فلسطین میں انسانی حقوق کی صورتِحال سے متعلق اقوامِ متحدہ کی نمائندہ فرانسسکا البانیز کو عہدے سے ہٹانے کا مطالبہ کردیا اور انہیں اخلاقی طور پر مفرور اور ذہنی طور پر غیر متوازن قرار دیا ہے۔ امریکی نمائندے نے البانیز پر الزام عائد کیا کہ وہ امریکہ، مغرب، اسرائیل اور یہودی عوام کے خلاف نفرت رکھتی ہیں۔ بارٹوس نے کہا کہ اقوامِ متحدہ ایک ایسے دھوکے باز کو ادارے کی ساکھ داغ دار کرنے کی اجازت دیتا ہے جو اقوامِ متحدہ کی وردی پہنے ہوئے ہے، حالانکہ وہ انہی تنازعات کو ہوا دے رہی ہیں جنہیں ختم کرنے کے لیے یہ ادارہ قائم کیا گیا تھا، اور ان کے الفاظ دہشت گردوں کے نعروں میں بھی سنائی دیتے ہیں۔ انہوں نے دعویٰ کیا کہ اقوامِ متحدہ کے بعض ساتھی نجی گفتگو میں بھی اسی نوعیت کے خیالات کا اظہار کر چکے ہیں۔ بارٹوس نے البانیز اور ان جیسے دیگر افراد کو ادارے کے لیے زہر اور کسی کے لیے بھی مفید نہ ہونے والے افراد قرار دیا۔