جنرل عاصم منیر کی توثیق، پی ٹی آئی کا بھی خیر مقدم

اسلام آباد: صدر عارف علوی کی جانب سے جنرل عاصم منیر کی بطور آرمی چیف توثیق کے بعد کئی روز سے جاری ہیجان ختم ہوگیا۔صدر عارف علوی نے آئین کے آرٹیکل 243 کے تحت وزیراعظم کی ایڈوائس پر منظوری دی۔جنرل سیدعاصم منیر کی بطور آرمی چیف تعیناتی کا اطلاق 29 نومبر سے ہوگا۔ جبکہ جنرل ساحر شمشاد مرزا کی بطور جوائنٹ چیفس تعیناتی کا اطلاق 27 نومبر سے ہوگا۔ تعیناتی کے بعد جنرل عاصم منیر اور جنرل ساحر شمشاد نے صدر سے ملاقاتیں کیں۔ صدر نے دونوں کو نئی پیشہ ورانہ ذمہ داریوں پرمبارکباد دی۔ دونوں جنرلز نے وزیراعظم محمد شہباز شریف سے بھی علیحدہ علیحدہ ملاقات کی۔ وزیراعظم نے جنرل ساحر شمشاد مرزا اورجنرل سید عاصم منیر کو مبارکباد دی اور ان کی نئی ذمہ داریوں کیلئے نیک خواہشات کا اظہار کیا۔ وزیراعظم نے کہا کہ امید ہے کہ آپ کی سربراہی میں مسلح افواج قومی سلامتی کو درپیش چیلنجز سے احسن انداز میں نمٹیں گی۔ سنیارٹی کے اصول پر فیصلہ ادارے کی مضبوطی کے ساتھ ملک میں استحکام کا باعث بنے گا۔ پاکستان تحریک انصاف نے پاک فوج کے نئے سربراہ اور چیئرمین جوائنٹ چیفس آف کمیٹی کی تقرری کا خیر مقدم کرتے ہوئے توقع کی ہے کہ فوج کی نئی قیادت ملک میں آئینی حقوق کی بحالی اور جمہوریت کے استحکام کیلیے اپنا کردار ادا کرے گی۔