کشمیر: 34 سال میں 2348 خواتین شہید، 11 ہزار سے زائد جنسی ہراسانی کا شکار

سری نگر : مقبوضہ جموں وکشمیر میں ظالم بھارتی فورسز نے 34 سال میں 2ہزار 348سے زائد خواتین کو شہید کردیا۔ کشمیر میڈیا سروس کی رپورٹ کے مطابق 1989 سے اب تک 11 ہزار 256 سے زائد خواتین کی بے حرمتی کی گئی۔ 34 برس سے جاری فورسز کی کارروائیوں کے دوران 22 ہزار 952 سے زائد خواتین بیوہ ہوئیں۔ بتایا گیا ہے کہ ہندوستان خواتین کی عصمت دری کو مقبوضہ علاقے میں ایک جنگی ہتھیار کے طور پر استعمال کر رہا ہے۔ 63 سالہ معمر آسیہ اندرابی ، فہمیدہ صوفی اور ناہیدہ نسرین سمیت دو درجن سے زیادہ خواتین گزشتہ 5 سال سے بدنام زمانہ تہاڑ جیل میں غیر قانونی طور پر نظر بند ہیں۔ کشمیری خواتین کو ان کے پیاروں کے قتل ، گرفتاریوں اور دوران حراست جبری گمشدگیوں کے ذریعے ذہنی طور پر تشدد کا نشانہ بنایا جاتا ہے۔بھارتی فوجی کشمیریوں کی تذلیل کیلئے خواتین کوروزانہ کی بنیاد پر جنسی طور پر ہراساں کر رہے ہیں۔ رپورٹ میں کہاگیا ہے کہ انسانی حقوق کی بین الاقوامی تنظیموں کو کشمیری خواتین کے انسانی حقوق کی سنگین خلاف ورزیاں اور انکے خلاف گھنائونے جرائم کو روکنے کیلئے بھارت پر دبائو بڑھانا چاہیے۔