امریکا کی ایک نہ چلی، اقوام متحدہ میں یوم نکبہ منانے کی منظوری

نیویارک : اقوام متحدہ کی جنرل اسمبلی نے فلسطینیوں کا یوم نکبہ منانے کی منظوری دیدی۔ جنرل اسمبلی میں فلسطین، مصر اور اردن سمیت کئی ممالک نے یوم نکبہ منانے کی قرارداد پیش کی۔ امریکا، برطانیہ اور اسرائیل کی مخالفت کے باوجود 90 ممالک نے قرارداد کے حق میں ووٹ دیا۔ کینیڈا، ڈنمارک، جرمنی اور برطانیہ سمیت 30 ممالک نے مخالف میں ووٹ ڈالا جبکہ 47 ممالک غیر حاضر رہے۔ فلسطینی ہر سال 15 مئی کو اسرائیل کے قیام کے دن یوم نکبہ مناتے ہیں۔ یہ وہ دن ہے جب 74 سال قبل اسرائیلی حکومت نے لاکھوں فلسطینیوں کو زبردستی ان کے گھروں سے بے دخل کیا تاکہ اسرائیلی آباد کاروں کے لیے راستہ بنایا جا سکے۔ بہت سے مورخین نے یوم نکبہ کو فلسطینیوں کی نسلی تطہیر کا عروج قرار دیا ہے۔