مکہ معاہدہ سعودی عرب اور ترکیہ کے ساتھ پاکستان کی شراکت داری کی علامت ہے، اسحاق ڈار

اسلام آباد: نائب وزیرِ اعظم و وزیرِ خارجہ اسحاق ڈار نے کہا ہے کہ مکہ معاہدہ سعودی عرب اور ترکیہ کے ساتھ پاکستان کی شراکت داری کی علامت ہے، یہ معاہدہ کسی ملک کے خلاف نہیں، پاکستان خطے میں پرامن، مستحکم اور معاشی طور پر مربوط ماحول کا خواہاں ہے۔
مارگلہ ڈائیلاگ کی افتتاحی تقریب سے خطاب کرتے ہوئے اسحاق ڈار نے کہا ہے کہ خطے اور دنیا کو درپیش چیلنجز کا جائزہ لینے کیلئے مارگلہ ڈائیلاگ کا انعقاد اہمیت کا حامل ہے، عالمی قوانین کا غیر منصفانہ اطلاق تفریق پیدا کرتا ہے، اقوامِ متحدہ سمیت عالمی اداروں کو مزید مؤثر کردار ادا کرنا ہو گا۔ انہوں نے کہا ہے کہ ابھرتی ہوئی ٹیکنالوجی نئے مواقع پیدا کر رہی ہے، تاہم بین الاقوامی سلامتی کا نظام شدید دباؤ کا شکار ہے، مشترکہ چیلنجز سے نمٹنے کے لیے باہمی تعاون اور کثیرالجہتی سفارت کاری کو فروغ دینا ہو گا۔
نائب وزیرِ اعظم کا کہنا ہے کہ پاکستان اس بات کا حامی ہے کہ کسی ملک کی سر زمین دوسرے ملک کے خلاف دہشت گردی کے لیے استعمال نہ ہو، قومی سلامتی کا تحفظ اور علاقائی استحکام برقرار رکھنا اہم چیلنجز ہیں۔ انہوں نے کہا ہے کہ سعودی عرب اور ترکیہ کے ساتھ مجوزہ دفاعی تعاون علاقائی امن و استحکام کے عزم کی عکاسی کرتا ہے، پاکستان قومی سلامتی مضبوط بنانے کے ساتھ سفارتی روابط اور ترقی کے مواقع بھی برقرار رکھنا چاہتا ہے۔