غزہ: بارشوں نے پہلے سے تباہ حال صورتحال مزید بدتر کردی، تودے گرنے سے 5 فلسطینی شہید

غزہ : غزہ میں اسرائیلی جنگ کے نتیجے میں گھروں کی وسیع پیمانے پر تباہی کے بعد شدید بارشوں نے فلسطینیوں کی انسانی صورتحال مزید سنگین کردی ہے۔
شدید بارشوں کے باعث غزہ میں بے گھر افراد کے کیمپوں میں قائم ہزاروں خیمے زیر آب آگئے ہیں۔ خیموں میں بارش کا پانی داخل ہوگیا، جہاں دسیوں ہزار افراد نے پناہ لے رکھی ہے. بارش کے پانی کے باعث کچھ خیمے بہہ گئے جبکہ بستروں، گدوں اور کمبلوں سمیت ضروری سامان بھی بھیگ کر ناقابل استعمال ہوگیا۔ بچوں نے ایک اور رات بارش کے پانی میں گذاری، بارش کا پانی داخل ہونے کے بعد سینکڑوں خاندان اپنے کیمپ چھوڑنے پر مجبور ہوگئے، وسطی غزہ میں شدید بارش کے دوران ریت کا ایک بڑا تودہ بے گھر فلسطینی خاندانوں کے خیموں پر گرنے سے تین بچوں اور دو خواتین سمیت 5 افراد شہید ہوگئے۔
سول ڈیفنس نے بے گھر فلسطینیوں کو خبردار کیا ہے کہ وہ بارش کے دوران ریت کے بڑے ڈھیروں اور بلند مٹی کے ٹیلوں کے قریب خیمے نہ لگائیں اور نہ ہی وہاں قیام کریں کیونکہ یہ ان کی زندگیوں کے لیے خطرہ بن سکتے ہیں۔