Raza Musani 
ہیگ : فلسطینی وزیر خارجہ ریاض المالکی نے فلسطینیوں کیخلاف صیہونی جرائم کے شواہد پر مبنی دستاویزات بین الاقوامی فوجداری عدالت کے پراسیکیوٹر کریم خان کے حوالے کردیں۔ریاض المالکی نے دی ہیگ میں کریم خان کے ساتھ ملاقات کی اور ان پر زور دیا کہ فلسطین نے آئی سی سی اور پراسیکیوٹر آفس کو دستاویزی معلومات جمع کرانے کے لیے تعاون جاری رکھا ہوا ہے۔ یہ معلومات ثابت کرتی ہیں کہ اسرائیلی فوجی اور سویلین حکام نے فلسطینی عوام کیخلاف سنگین اور مسلسل جرائم کا ارتکاب کیا ہے۔اور یہ تمام جرائم آئی سی سی کے دائرہ اختیار میں آتے ہیں۔ انہوں نے انتہاپسند حکومت کو جنگی جرائم کا جوابدہ ٹہرانے کیلئے آئی سی سی کی اہمیت اور اس کے کردار پرزور دیا۔ فلسطینی وزیر نے کہا کہ مجرموں کو بین الاقوامی انصاف کے کٹہرے میں لانے سے فلسطینی عوام کے تحفظ اور ان کے خلاف ہونے والے جرائم کو روکنے میں مدد ملے گی۔انہوں نے آئی سی سی پراسیکیوٹر سے مطالبہ کیا کہ وہ فلسطین کا دورہ کریں اور انصاف کے حصول کے لیے تمام ضروری ذرائع اور ترجیحات فراہم کریں۔
