Raza Musani 
بھارت میں اقلیتوں پر حملے کوئی نئی بات نہیں ہیں لیکن کورونا بحران کے دوران بھارت اقلیتوں کو ہدف بنانے والوں میں پہلے ملک پر ہے۔ یہ انکشاف امریکہ کے تھنک ٹینک ’پیو ریسرچ سینٹر‘ نے اپنی رپورٹ میں کیا، رپورٹ کے مطابق کورونا بحران کے دوران بھارت میں مذہبی بنیاد پر اقلیتوں کو سب سے زیادہ نشانہ بنایا گیا۔ بھارت دنیا میں سب سے خراب کارکردگی والے ممالک کی فہرست میں پہلے نمبر پر ہے۔ پیو ریسرچ سینٹر کی رپورٹ میں بتایا گیا ہے کہ 2020ء میں بھارت دنیا کے ان ممالک میں سب سے اوپر تھا جہاں وباء کے پس پشت اقلیتوں کو ہدف بنایا گیا۔ اس کے لئے سوشل میڈیا پر کئی طرح کی مہم بھی چلائی گئی۔ تحقیق کے مطابق کورونا وباء کے دوران الگ الگ طرح کے ہیش ٹیگ چلا کر اقلتیوں کو نشانہ بنایا گیا، جس میں ’’کورونا جہاد‘‘ جیسے ہیش ٹیگ بھی شامل ہیں۔
پیو ریسرچ سینٹر نے مجموعی طور پر دنیا کے 198 ممالک کو اپنی تحقیق کے دائرے میں لیا۔ ان میں سب سے خراب کارکردگی بھارت کی رہی۔ اسٹڈی میں ایسے 11 ممالک کو الگ کیا گیا ہے جنہوں نے ایس ایچ آئی (سوشل ہاسٹلٹیز انڈیکس) میں سب سے خراب کارکردگی کی ہے۔ اس میں بھارت کو نائیجیریا، افغانستان، اسرائیل، مالی، صومالیہ اور پاکستان سے بھی پیچھے دکھایا گیا ہے۔ اس فہرست میں مصر، لیبیا اور سیریا جیسے ممالک بھی شامل ہیں۔ فہرست میں پہلی رینکنگ کا مطلب سب سے خراب کارکردگی ہے۔
