Raza Musani 
ڈیرہ مراد جمالی : مجلس وحدت مسلمین پاکستان کے مرکزی رہنماء اور ادارہ مرکز تبلیغات اسلامی بلوچستان کے چیئرمین علامہ مقصود علی ڈومکی، ایم ڈبلیو ایم عزاداری ونگ بلوچستان کے صوبائی صدر علامہ سید ظفر عباس شمسی اور دیگر رہنماؤں نے ڈیرہ مراد جمالی کی مسجد حسینی و امام بارگاہ کربلائی کا دورہ کیا اور وہاں پیش آنے والے افسوسناک واقعے کا جائزہ لیا۔ رہنماؤں نے مسجد و امام بارگاہ کی دیوار توڑے جانے اور مقدس مقام کی مبینہ بے حرمتی کے واقعے پر شدید تشویش اور افسوس کا اظہار کیا۔
علامہ مقصود علی ڈومکی نے کہا کہ مسجد اور امام بارگاہ مقدس مذہبی مقامات ہیں۔ ان کی بے حرمتی یا نقصان پہنچانے کی کسی بھی کوشش کو برداشت نہیں کیا جا سکتا۔ انہوں نے کہا کہ ڈیرہ مراد جمالی میں پیش آنے والا واقعہ انتہائی تشویشناک ہے۔ پولیس اور ضلعی انتظامیہ کی بنیادی ذمہ داری ہے کہ وہ تمام مذہبی مقامات اور شہریوں کے مذہبی حقوق کا تحفظ یقینی بنائے۔ انہوں نے اعلان کیا کہ سوموار 11 اکتوبر کو حسینی مسجد و کربلائی امام بارگاہ میں مجلس عزاء و عزاداری منعقد ہوگی اور مسجد و امام بارگاہ کی بے حرمتی کے خلاف احتجاج ہوگا.
