بم دھماکوں کے بعد صیہونی فورسز فلسطینی آبادیوں پر ٹوٹ پڑیں، دو فلسطینی شہید

تل ابیب : یروشلم میں بم دھماکوں کے بعد صیہونی فورسز فلسطینی آبادیوں پر ٹوٹ پڑی۔اسرائیلی افواج نے مقبوضہ بیت المقدس کے گاؤں کو سیل کرکے بیت اکسا پر چھاپہ مارا۔ اور فلسطینیوں کے گھروں کی تلاشی لی اور مکینوں کو زدوکوب کیا۔ فوجیوں نے فلسطینی ٹی وی کے لیے کام کرنے والے صحافی احمد حبابی کو بھی تشدد کا نشانہ بنایا۔ صیہونی آبادگاروں نے بھی مغربی کنارے کے متعدد علاقوں میں فلسطینیوں اور ان کے گھروں پر حملہ کیا۔ فلسطینیوں کی گاڑیوں میں توڑ پھوڑ کی۔ نابلس میں آباد کاروں نے ایک گاڑی کو آگ لگا دی آباد کاروں نے ایک فلسطینی کے گھر کو بھی آگ لگانے کی کوشش کی۔ دوسری جانب نابلس میں اسرائیلی فائرنگ سے زخمی دو فلسطینی دم توڑ گئے۔ جن میں 22 سالہ محمد ہشام اور 30سالہ محمد احمد حسن شامل ہیں۔ نوجوان کے پیٹ میں گولی لگی تھی اس کی جان بچانے کی تمام کوششیں ناکام ہو گئیں۔ رواں سال اب تک اسرائیلی فوج کے ہاتھوں شہید ہونے والے فلسطینیوں کی تعداد 201 ہوگئی ہے۔