Raza Musani 
روس نے اپنے جوہری ہتھیاروں کے پروگرام کو ترقی دینے اور نئے اسٹریٹجک میزائلوں کی تعیناتی کے لیے بنیادی ڈھانچے کی تعمیر کا منصوبہ بنالیا۔ روسی وزیر دفاع سرگئی شوئیگوف نے کہاکہ ماسکو اپنی میزائل فورسز کی جنگی صلاحیتوں کو بہتر بنانے کے لیے کام کرے گا۔ نئے جوہری میزائل نظام کو ایڈجسٹ کرنے کے لیے سہولیات تعمیر کی جا رہی ہیں۔ انہوں نے کہا کہ 2023 کے لیے بنیادی تعمیر کے منصوبوں میں اسٹریٹجک نیوکلیئر فورسز کی تعمیر پر خصوصی توجہ دی جائے گی۔ انہوں نے کہاکہ لانگ رینج کے متعدد راکٹ لانچر اور ملکا ہائی پاور آرٹلری سسٹم اس منصوبے کے نفاذ میں شامل ہیں۔ اس سے غیر ملکی راکٹ اور توپ خانے کے نظام کو مؤثر طریقے سے نشانہ بنانا ممکن ہو جاتا ہے۔ پیوٹن پہلے کہہ چکے ہیں کہ اگر ضرورت پڑی تو تمام دستیاب ذرائع سے روس کی علاقائی سالمیت کا دفاع کریں گے۔ انہوں نے یوکرین میں جوہری یا کیمیائی ہتھیاروں کی ممکنہ تعیناتی کے بارے میں میڈیا کی قیاس آرائیوں کو مسترد کرتے ہوئے کہا ہے کہ ماسکو کو تنازع میں اپنے مقاصد کے حصول کے لیے جوہری ہتھیاروں کو استعمال کرنے کی کوئی ضرورت نہیں ہے۔
