Raza Musani 
مقبوضہ بیت المقدس : علاقائی اور بین الاقوامی سول سوسائٹی کی ایک سو ستانوے تنظیموں نے فلسطین کی صورتحال پر بین الاقومی فوجداری عدالت اور اسمبلی آف اسٹیٹس پارٹیز کی صدر کو کھلے خط بھیج دئے۔آئی سی سی کے پراسیکیوٹر کریم خان کے نام خط میں ان سے فلسطین میں اسرائیل کی نسل پرست حکومت کے جرائم کی تحقیقات اور روک تھام کا مطالبہ کیا گیا ہے۔ خط میں کہا گیا ہے کہ آئی سی سی پراسیکیوٹر کا مینڈیٹ نہ صرف بین الاقوامی جرائم کی تحقیقات بلکہ ان کے دفتر کی جانب سے کی گئی سابقہ تحقیقات کی نگرانی اور قبل از وقت وارننگ کا کام انجام دینے کا موقع فراہم کرتا ہے۔ اے ایس پی کی صدر سلویا فرنانڈیز ڈی گورمینڈی کے نام خط میں اے ایس پی کے اس اہم کردار پر روشنی ڈالی گئی ہے جو وہ بین الاقوامی فوجداری عدالت کی حمایت میں ادا کرتا ہے۔ خطوط میں اس بات پر زور دیا گیا کہ اسرائیل کی نسل پرست حکومت کی جانب سے تفتیش یا مقدمے کے مرحلے میں ثبوت جمع کرنے میں مداخلت یا ان سے چھیڑچھاڑ انصاف فراہم کرنے والوں کے خلاف جرائم کے مترادف ہیں۔ فلسطینی سول سوسائٹی کے دفاتر پر تازہ ترین چھاپے نسل پرست حکام کی جانب سے اپنے جرائم کو چھپانے کی ایک کوشش معلوم ہوتے ہیں۔
