آبنائے ہرمز کا مکمل کنٹرول اور انتظام ایران کے پاس ہی رہے گا، میجر جنرل یحییٰ رحیم

تہران: ایران نے ایک بار پھر واضح کیا ہے کہ کسی مذاکرات کے نتیجے میں بھی آبنائے ہرمز کا مکمل کنٹرول اور انتظام اسلامی جمہوریہ کے پاس ہی رہے گا، ولی امر مسلمین کے عسکری مشیر میجر جنرل یحییٰ رحیم صفوی نے کہا کہ کہ ایران اور عمان آبنائے ہرمز کے انتظام کے لیے ایک طریقہ کار پر متفق ہوگئے تھے تاہم امریکیوں نے اس میں رکاوٹ ڈال دی۔
یحییٰ رحیم صفوی نے کہا ہے کہ آبنائے ہرمز کبھی اپنی سابقہ صورتحال پر واپس نہیں آئے گی اور ایران اس کے انتظام و کنٹرول کو مکمل طور پر جاری رکھے گا۔ انہوں نے کہا کہ خلیج کو بحیرۂ احمر سے اور آبنائے ہرمز کو باب المندب سے جوڑنے کی ایران کی حکمت عملی میدانِ جنگ کی صورتحال تبدیل کردے گی۔ ایرانی عسکری مشیر نے حوثیوں کا حوالہ دیتے ہوئے کہا کہ ان کے اپنے اہداف اور حکمت عملی ہے اور انہوں نے ہتھیاروں کی تیاری میں نمایاں پیش رفت کی ہے۔ اس سے قبل میجر جنرل یحییٰ رحیم صفوی نے خبردار کیا تھا کہ اگر امریکا یا اسرائیل نے ایران پر دوبارہ حملہ کیا تو خطے میں جنگ بحرِ ہند اور اس سے آگے تک پھیل سکتی ہے۔