Raza Musani 
تہران: ایرانی وزیر خارجہ حسین امیر عبداللہیان نے کہا کہ ایران کو تقسیم کرنے اور خانہ جنگی کو ہوا دینے کی سازش ناکام ہو گئی ہے۔ تہران میں نیوز کانفرنس کرتےہوئے ایرانی وزیرخارجہ نے کہاکہ وزارت داخلہ کو دہشت گردی اورخانہ جنگی کے دستاویزی ثبوت مل گئے ہیں۔انہوں نے بعض مغربی ممالک کے انسانی حقوق کے دعوؤں کومزید مسترد کرتے ہوئے کہاکہ مغرب کی تاریک تاریخ اُسے ایسے دعوے کرنےکی اجازت نہیں دیتی۔ حسین امیرعبداللہیان نے کہاکہ ہمیں امریکا اور یورپ کی ضرورت نہیں ہے جو انسانی حقوق پامال کرنے کی طویل تاریخ رکھتے ہیں اور اقوام اور ممالک کا استحصال کرنے کی سیاہ تاریخ درج کراچکے ہیں۔ ایسے ممالک کو اسلامی جمہوریہ ایران میں انسانی حقوق سے متعلق دعوؤں کا کوئی حق نہیں ہے۔انہوں نے مظاہرین کے خلاف طاقت کے استعمال کا دعویٰ مسترد کرتے ہوئے کہا کہ پولیس نے حالیہ فسادات کے دوران حکمت عملی سے صبر اور تحمل کا مظاہرہ کیا۔ یہ حقیقت کہ 50 سے زائد سیکیورٹی اہلکاروں کو فسادیوں نے شہید کیا۔ ہزاروں محافظوں کے زخمی ہونے سے سیکیورٹی فورسز کی انسانی حقوق کی پاسداری اور تحمل کا ثبوت ملتا ہے۔
