واشنگٹن: امریکی صدر ڈونلڈ ٹرمپ نے کہا ہے کہ وہ ایران کو جوہری ہتھیار حاصل کرنے سے روکنے کے لیے ایک مستقل معاہدہ چاہتے ہیں، تاہم انہوں نے اسلامی جمہوریہ ایران کی قیادت کی تبدیلی کو زیادہ اہمیت دینے سے گریز کیا۔
فاکس نیوز کو ٹیلی فون پر انٹرویو دیتے ہوئے ٹرمپ نے کہا کہ وہ ایسا معاہدہ چاہتے ہیں جسے مستقبل کے امریکی صدور بھی ختم نہ کرسکیں۔ ان کا کہنا تھا کہ تہران کی تاریخ رہی ہے کہ وہ معاہدوں کی خلاف ورزی کرتا ہے۔ ٹرمپ نے کہا کہ میں ایسا معاہدہ کروں گا جو مستقل ہوگا، تاکہ اگر چار، 15 یا 20 سال بعد کوئی نااہل امریکی صدر بھی آجائے تو وہ اس معاہدے کو ختم نہ کرسکے۔ان سے پوچھا گیا کہ آیا تنازع ختم ہونے کے بعد ایران کی موجودہ حکومت برقرار رہے گی؟ اس پر ٹرمپ نے کہا کہ دیکھیں، میں نے کبھی ایران کے نظامِ حکومت کو زیادہ اہمیت نہیں دی۔ کچھ لوگوں نے حکومت کی تبدیلی کی بات کی، لیکن آپ وضاحت کریں کہ اس سے کیا مراد ہے، کیونکہ میں پہلے ہی دو حکومتوں کا خاتمہ کرچکا ہوں۔


































