Raza Musani 
واشنگٹن: امریکی صدر ڈونلڈ ٹرمپ کو قتل کرنے کا مبینہ منصوبہ ناکام بنا دیا گیا، سیکرٹ سروس نے وائٹ ہاؤس کے قریب سے بھاری اسلحے اور گولہ بارود سے لیس مشتبہ شخص کو گرفتار کرلیا۔ غیر ملکی میڈیا رپورٹس کے مطابق امریکی سیکرٹ سروس کے اہلکاروں نے جمعرات کی شب وائٹ ہاؤس کے قریب پارکنگ میں کھڑی ایک مشکوک گاڑی کی تلاشی لی، جس کے دوران تین مختلف آتشیں ہتھیار اور درجنوں گولیاں برآمد ہوئیں۔
امریکی حکام کے مطابق گرفتار شخص کی شناخت رونی یورڈریکس گوانیپا چرینوس کے نام سے ہوئی ہے، جس کا تعلق وینزویلا سے بتایا جاتا ہے اور وہ 2024 سے امریکا میں غیر قانونی طور پر مقیم تھا، رپورٹس کے مطابق ملزم نے مبینہ طور پر حکام کو بتایا کہ اس کے ذہن میں آوازیں آرہی تھیں جو اسے امریکی دارالحکومت آنے اور صدر ٹرمپ کو قتل کرنے کے لیے کہہ رہی تھیں۔ سیکرٹ سروس کے مطابق ملزم جس گاڑی میں سوار تھا وہ بھی چوری شدہ تھی۔ ملزم کے خلاف مقدمہ درج کرکے مزید تحقیقات شروع کردی گئی ہیں۔
