ایران کا اصل تصادم عالمی تسلط سے ہے، فسادیوں کے گروپ سے نہیں، ولی امر مسلمین

تہران : ولی امر مسلمین آیت اللہ خامنہ ای نے کہا ہے کہ امریکہ کے ساتھ مذاکرات سے ہمارا مسئلہ حل نہیں ہوگا کیونکہ وہ اپنے وعدوں کو پورا نہیں کرتے اور مسلسل تاوان کا مطالبہ کرتے ہیں۔ ہفتہ بسیج کی مناسبت سے بسیج کی بڑی تعداد سے خطاب میں ولی امر مسلمین نے کہاکہ ایران کی جنگ فسادیوں کے اس گروہ سے نہیں ہے جس نے حال ہی میں ملک میں تباہی مچا دی ہے بلکہ اصل تصادم عالمی تسلط سے ہے۔ یہ چند لوگ یا تو غافل، جاہل یا کرائے کے قاتل ہیں۔ آیت اللہ خامنہ ای نے کہا کہ حالیہ فسادات امریکہ کے ساتھ مذاکرات میں اپنے حقوق پر سمجھوتہ کرنے کے لیے ایران پر مغرب کے دباؤ کا حصہ ہیں، جو واشنگٹن کے عزم کی کمی کی وجہ سے تعطل کا شکار ہیں۔امریکہ کے ساتھ مذاکرات سے ہمارے مسائل حل نہیں ہوں گے۔ صرف ایک چیز سے امریکہ کے ساتھ ہمارا مسئلہ حل ہو جائے گا اور وہ ہے امریکا کو تاوان ادا کرنا، لیکن صرف ایک تاوان نہیں، وہ مستقل تاوان کا مطالبہ کر رہے ہیں۔