Raza Musani 
تہران : ولی امر مسلمین آیت الله سید مجتبیٰ حسینی خامنہ ای نے پولیس و سیکیورٹی فورسز کے ہفتے کے موقع پر اپنے پیغام میں کہا کہ حالیہ برسوں میں ملک کی سلامتی کے قیام میں سیکیورٹی فورسز کا نمایاں کردار مزید اہمیت اختیار کر گیا ہے اور دوسری و تیسری مسلط کردہ جنگوں میں اس کے اثرات مزید واضح ہوئے۔ انہوں نے کہا کہ حالیہ جنگوں میں فورسز کا امن و امان قائم رکھنے میں کردار بے مثال رہا۔
ولی امر مسلمین نے کہا ہے کہ امریکی اور اسرائیلی حملے ایرانی پولیس فورس کو فرائض کی انجام دہی سے روکنے میں ناکام رہے۔ آیت اللہ مجتبیٰ خامنہ ای نے پولیس فورس کو جدید ٹیکنالوجی اور مصنوعی ذہانت کے استعمال سے مزید مضبوط بنانے پر بھی زور دیا ہے۔ انہوں نے کہا کہ امریکی اور اسرائیلی حملوں میں اعلیٰ سیکیورٹی عہدیداروں سے لے کر صفِ اول کے اہلکاروں تک کو نشانہ بنایا گیا، تاہم اہلکاروں نے سڑکوں اور گاڑیوں میں بھی اپنی ذمہ داریاں جاری رکھیں۔ انہوں نے کہا کہ امن و سلامتی برقرار رکھنے والی فورسز کو ہر لحاظ سے مضبوط بنانا ضروری ہے۔ اس مقصد کے لیے افرادی قوت، ہارڈ ویئر اور سافٹ ویئر کو بہتر بنانے کے ساتھ ساتھ جدید ٹیکنالوجی کا فروغ بھی اہم ہے۔ خصوصاً ڈیٹا کے تجزیے میں مصنوعی ذہانت کا ہدفی اور مؤثر استعمال قانون نافذ کرنے والے اداروں کی کارروائیوں کو بہتر بنانے اور فرائض کی انجام دہی کو آسان بنانے میں اہم کردار ادا کرسکتا ہے.
