Raza Musani 
کراچی : اہلسنت کے معروف عالمِ مفتی تقی عثمانی نے کہا ہے کہ شریعت کا نفاذ اہم ترین معاملہ ہے لیکن اس کیلئے مسلح جدوجہد کی ضرورت نہیں۔ پاکستان سے سودی نظام کے خاتمے سے متعلق سیمینار سے خطاب میں مفتی تقی عثمانی نے کہا کہ خوشی ہے کہ تمام مکاتبِ فکر کے علماء سیمینار میں شریک ہیں۔ نظریاتی اختلافات کا دائرہ علمی حلقوں تک محدود رہنا چاہیے، ایسا فورم وجود میں آنا چاہیے جس میں سلگتے ہوئے مسائل پر متفقہ مؤقف پیش کیا جا سکے۔ انہوں نے کہا کہ بلاسود بینکاری کو عملی طور پر لاگو کیا جائے، مسلمانوں کے مختلف مکاتب فکر میں سود سے متعلق کوئی اختلاف نہیں۔ سود کی لعنت کو ختم کرنے کے لیے متفقہ آواز بلند کرنی ہے، حکومت اور متعلقہ اداروں سے مطالبہ ہے کہ سود کے خاتمے کے لیے عملی کوشش کریں۔
