اروناچل میں چینی فوج سے جھڑپ، بھارتی فوجی پیچھے ہٹنے پر مجبور

نئی دہلی: ہندوستان کی ریاست اروناچل میں سرحدی علاقے توانگ میں چین کی فوج کے ساتھ جھڑپ میں ہندوستانی فوج کے متعدد اہلکار زخمی ہوکر پسپا ہونے پر مجبور ہوگئے۔ رواں ہفتے ہونے والی جھڑپ بھی سرحدی خلاف ورزی پر ہوئی اور دونوں اطراف سے الزام ایک دوسرے پر عائد کیے گئے۔دونوں جانب سے چند اہلکاروں کو معمولی چوٹیں بھی آئیں۔جھڑپ میں ہندوستانی فوج کے زیادہ اہلکار زخمی ہوئے جن میں اصل تعداد معلوم نہیں ہوسکی تاہم وزارت دفاع کی جانب سے جاری بیان میں کہا گیا ہے کہ چینی فوجی ہندوستانی پوسٹ کو ہٹانے پہنچے تھے۔ جس پر دونوں فوجوں کے درمیان تصادم ہوا۔توانگ سیکٹر میں ہونے والی مڈبھیڑ کے بعد افسران کی مداخلت سے دونوں اطراف کے فوجی اہلکار پیچھے ہٹ گئے اور جھڑپ ختم ہوگئی۔ دونوں ممالک کی فوجوں کے کمانڈرز نے مشترکہ طور پر فلیگ مارچ کیا۔