جنرل اسمبلی: اسرائیل کیخلاف ایک اور قراردار بھاری اکثریت سے منظور

نیویارک : اقوام متحدہ کی جنرل اسمبلی نے اسرائیل کے ایٹمی ہتھیاروں کیخلاف ایک اور قراردار بھاری اکثریت سے منظور کرلی۔ اسرائیل مخالف قرار داد کے حق میں 149 ممالک نے ووٹ دیا جبکہ صرف چھ ممالک نے مخالفت کی۔ قرار داد میں اسرائیل پر زور دیا گیا ہے وہ جوہری ہتھیاروں کو ترک کر دے اور جوہری ہتھیاروں کے عدم پھیلاؤ کے معاہدے این پی ٹی میں شامل ہوجائے۔ اکتوبر میں جنرل اسمبلی کی پانچویں کمیٹی نے یہ قرار داد پانچ کے مقابلے میں 152 ووٹوں سے منظور کی تھی۔ قرارداد میں اسرائیل پر زور دیا گیا ہے کہ وہ جوہری ہتھیاروں کی تیاری،ترقی، تجربات بند کردے۔ یہ قرارداد فلسطین اور مشرق وسطیٰ میں اسرائیل کے اتحادیوں مصر، اردن، بحرین، مراکش، سوڈان اور متحدہ عرب امارات سمیت 20 ممالک نے پیش کی تھی۔