Raza Musani 
اسلام آباد: حکومت نے ضلع کرم کی اہم شاہراہ ٹل پارہ چنار روڈ کی طویل بندش کا معاملہ قومی اسمبلی میں اٹھانے سے روک دیا۔ رکن قومی اسمبلی انجینئر حمید حسین طوری نے اکیس اگست کو قومی اسمبلی میں سوال جمع کرایا تھا۔ جس میں وزیرِ داخلہ محسن نقوی سے ضلع کرم کی شاہراہوں کی طویل بندش کی وجوہات، امن و امان کی بحالی، عوام کی آزادانہ نقل و حرکت یقینی بنانے اور اس بندش کے باعث پیدا ہونے والے انسانی، معاشی اور تعلیمی مسائل کے حل کیلئے حکومتی اقدامات کی تفصیلات طلب کی گئی تھیں۔
قومی اسمبلی سیکریٹریٹ نے تحریری طور پر آگاہ کیا کہ اسپیکر قومی اسمبلی نے رول اٹہتر کے تحت مذکورہ سوال مسترد کر دیا ہے۔ اس فیصلے پر تشویش کا اظہار کرتے ہوئے ایم این اے انجینئر حمید حسین طوری نے کہا کہ پارلیمان عوام کی آواز، بنیادی حقوق کے تحفظ اور حکومتی احتساب کا سب سے اہم آئینی فورم ہے۔ اگر عوام کے بنیادی مسائل ہی ایوان میں زیرِ بحث لانے کی اجازت نہ ہو اور منتخب نمائندوں کو حکومت سے جواب طلب کرنے کا موقع نہ دیا جائے تو متاثرہ عوام انصاف، تحفظ اور حکومتی جوابدہی کے لیے آخر کس فورم سے رجوع کریں؟.
