شوق سے ایران نہیں جاتا وزیراعظم نے خصوصی ذمہ داری دے رکھی ہے، محسن نقوی

اسلام آباد: وزیرِ داخلہ محسن نقوی نےکہا ہے کہ وہ ایران اپنے شوق سے نہیں جاتے بلکہ وزیرِ اعظم نے انھیں چند خصوصی ذمہ داریاں سونپ رکھی ہیں۔
سینیٹ کے اجلاس سے خطاب میں محسن نقوی نے کہا کہ ان کا دورۂ ایران وزیر اعظم کی جانب سے دی گئی ذمہ داری نبھانے کے سلسلے میں تھا، اور اس کا تعلق اسرائیل اور امریکہ کی جانب سے ایران کے خلاف جنگ کے بعد وہاں موجود بحران سے ہے۔ تقریر کے دوران محسن نقوی نے فضل الرحمان پر تنقید کی جس پر ان کی جمعیت علمائے اسلام کے سینیٹرز سے تلخ کلامی بھی ہوئی۔
محسن نقوی نے تحریک انصاف کے سینیٹر علی ظفر کو مخاطب کرتے ہوئے دعویٰ کیا کہ یہی لوگ خیبر پختونخوا میں گورنر راج لگانے کا مطالبہ کرتے تھے۔ علی ظفر صاحب یہی لوگ گورنر راج لگنے سے پہلے ہمیں کہتے تھے کہ گورنر راج لگائیں، ہماری ان سے جان چھڑائیں ۔ تقریر میں محسن نقوی کا اشارہ بظاہر جمعیت علمائے اسلام کے اراکین کی جانب تھا، تاہم انھوں نے وضاحت نہیں کی کہ وہ کن کے بارے میں بات کر رہے ہیں۔