ایران کی جانب سے سفارت کاری کا دروازہ اب بھی کھلا ہے، عراقچی

تہران : وزیرِ خارجہ عباس عراقچی نے کہا ہے کہ ایران کی جانب سے سفارت کاری کا دروازہ اب بھی کھلا ہے۔ ثالثوں کے ساتھ تجاویز پر رابطے جاری ہیں۔ عباس عراقچی نے کہا ہے کہ ایران اپنے سات روزہ منصوبے پر عملدرآمد کے لیے ثالثوں کے ساتھ قریبی اور مسلسل رابطے میں ہے، اور اس منصوبے کو ایک ہفتے سے بھی کم عرصے میں نافذ کرنے کی تجاویز کا جائزہ لیا جا رہا ہے۔ سوشل میڈیا پلیٹ فارم ایکس پر اپنے بیان میں عباس عراقچی کا کہنا تھا کہ ایران کی مسلح افواج وطن کے دفاع کے لیے مکمل طور پر تیار ہیں، تاہم تہران سفارت کاری کو کامیاب ہونے کا ایک اور موقع دے رہا ہے۔ عراقچی نے مزید کہا کہ ثالثوں کے ساتھ مسلسل مشاورت جاری ہے تاکہ ایسی تجاویز پر اتفاق کیا جا سکے جن کے ذریعے سات روزہ منصوبے پر مقررہ مدت سے بھی پہلے عمل درآمد ممکن ہو۔ ایرانی وزیرِ خارجہ کے اس بیان سے ظاہر ہوتا ہے کہ تہران دفاعی تیاریوں کے ساتھ ساتھ سفارتی کوششوں کو بھی جاری رکھے ہوئے ہے۔