سعودی ایئرپورٹس پر یمنی حملوں میں 19 افراد ہلاک، 364 زخمی

ریاض: سعودی قیادت میں قائم اتحاد کے مطابق یمنی فوج کے سعودی عرب کے ہوائی اڈوں پر حملوں میں 19 افراد ہلاک اور 364 زخمی ہوئے۔ حملوں کا نشانہ ریاض کا کنگ خالد اور ابہا انٹرنیشنل ایئرپورٹ بھی بنے۔ سعودی اتحاد کے ترجمان ترکی المالکی نے پریس کانفرنس میں بتایا کہ اکتوبر کے آغاز سے سعودی عرب پر حملوں میں شدت آئی ہے۔ ان کے مطابق ایران نواز اس گروپ نے جولائی سے سعودی عرب کے خلاف کارروائیاں تیز کر رکھی ہیں۔ ترکی المالکی نے بتایا کہ ریاض کے کنگ خالد انٹرنیشنل ایئرپورٹ کو اکتوبر کے آغاز سے اب تک 20 حملوں میں نشانہ بنایا گیا۔ ان حملوں میں 7 سے 11 اکتوبر کے دوران 17 افراد ہلاک اور 333 زخمی ہوئے۔
ترجمان کے مطابق جنوب مغربی علاقے عسیر میں واقع ابہا انٹرنیشنل ایئرپورٹ پر حملے میں بھی دو افراد ہلاک اور 28 زخمی ہوئے۔ اتحاد کے اعداد و شمار کے مطابق جنوب مغربی علاقے جازان میں کنگ عبداللہ انٹرنیشنل ایئرپورٹ کو نشانہ بنانے والے ایک حملے میں مزید تین افراد زخمی ہوئے۔
سعودی حکام کے مطابق 5 اکتوبر سے اب تک سعودی عرب کے پانچ ہوائی اڈے حملوں کی زد میں آچکے ہیں۔ ان حملوں کے نتیجے میں جانی و مالی نقصان کے علاوہ فضائی آمدورفت بھی متاثر ہوئی ہے۔