غزہ کے بچوں کے ڈاکٹر آدم حموی رکن کانگریس منتخب

غزہ : غزہ میں زخمی فلسطینیوں کا علاج کرنے والے ڈاکٹر آدم حموی کانگریس کے رکن منتخب ہوگئے۔ امریکی میڈیا کے مطابق نیو جرسی میں مصری نژاد امریکی ڈاکٹر آدم حموی ایوان نمائندگان کے رکن منتخب ہوگئے ہیں، آدم حموی نیو جرسی سے کانگریس میں پہنچنے والے پہلے مسلمان ہیں جب کہ وہ کانگریس کے پہلے مصری نژاد رکن بھی ہوں گے۔ ڈیموکریٹ امیدوار نے ری پبلکن کے گریگ میل کو شکست دی ہے، نومنتخب ڈیموکریٹ رکن صحت کی سہولتیں اور سستے گھر دینے کے حامی ہیں، انہوں نے غیر قانونی تارکین وطن کو شہریت دینے کی حمایت بھی کی ہے۔ امریکی میڈیا کے مطابق آدم حموی نے اسرائیل کو امریکی فوجی امداد بند کرنے کا مطالبہ کیا ہے۔
ڈاکٹر آدم حموی نے 2024 اور 2025 میں غزہ میں رضاکارانہ طور پر طبی خدمات انجام دی تھیں۔ مصر میں پیدا ہونے والے اور امریکہ میں پرورش پانے والے 56 سالہ آدم حموی عراق جنگ میں بھی خدمات انجام دے چکے ہیں۔ بعد ازاں انہوں نے بوسنیا، سوڈان، لبنان اور شام میں طبی امدادی مشنز میں حصہ لیا۔
وہ 2024 میں اسرائیلی نسل کشی کے دوران انسانی ہمدردی کی بنیاد پر طبی خدمات انجام دینے کے لیے غزہ کے جنوبی علاقے گئے تھے۔ ان کے مطابق یہ تجربہ سیاست میں آنے کے فیصلے میں فیصلہ کن ثابت ہوا۔