تہران : ایران کے وزیر خارجہ عباس عراقچی نے غزہ میں اسرائیل کی جاری نسل کشی کے معاملے پر اسلامی تعاون تنظیم (او آئی سی) کے وزرائے خارجہ کا ہنگامی اجلاس بلانے کا مطالبہ کیا ہے۔ عراقچی نےسوشل میڈیا پلیٹ فارم ایکس پر عربی زبان میں جاری اپنے پیغام میں یہ مطالبہ ایسے وقت کیا جب اسرائیلی فوج نے محصور فلسطینی علاقے کے وسطی حصے میں دوبارہ زمینی فوجی کارروائی شروع کردی، جس کے نتیجے میں صرف ایک دن کے اندر 6 ہزار سے زائد فلسطینی اپنے گھروں سے بے دخل ہوگئے۔ عباس عراقچی نے غزہ میں جاری نسل کشی، جبری بے دخلی اور انسانی امداد کی فراہمی روکنے کو ’انسانیت کے اجتماعی ضمیر پر ایک بدنما داغ‘ قرار دیا اور عالمی برادری پر زور دیا کہ وہ فوری اقدامات کرتے ہوئے اسرائیلی محاصرہ ختم کرائے اور انسانی امداد کی فراہمی یقینی بنائے۔ انہوں نے کہاکہ میں نے اسلامی تعاون تنظیم کے سیکریٹری جنرل سے درخواست کی ہے کہ وزرائے خارجہ کا ہنگامی اجلاس طلب کیا جائے۔


































