(کورونا وائرس) امریکی معیشت کا جنازہ نکل گیا، کھربوں کا نقصان

وائرس سے ہزاروں ہلاکتیں،لاکھوں مریض، ڈھائی کروڑ افرا دبیروزگار، متاثرین کی مدد کیلئے امریکی حکومت نے کھربوں ڈالر کے تین پیکجز متعارف کرادئے
تیل مفت سے بھی سستا،گھر لے جانے کے پیسے الگ،تیل کے کنویں بند ہونے لگے، حصص بازار بھی بدترین مندی کا شکار،کھربوں ڈالر مٹی میں مل گئے
واشنگٹن (نیوز ڈیسک) کورونا وائرس نے امریکا کو بڑے پیمانے پر جانی نقصان پہنچانے کے ساتھ ساتھ اس کی معیشت کا بھی بھٹہ بٹھادیا، وائرس کی وجہ سے امریکا ہلاکتوں اور مریضوں کی تعداد میں سرفہرست ہے، امریکا میں ہلاکتیں 48ہزار اور مریضوں کی تعداد 9لاکھ تک جاپہنچی ہے،امریکا میں ایک دن میں 2806 ہلاکتوں کا ریکارڈ بھی قائم ہوا، ایک جانب تو امریکا میں ہلاکتیں اور مریضوں کی تعداد بڑھ رہی ہے اور دوسری جانب معیشت کا بھی بیڑا غرق ہوچکا ہے، ڈھائی کروڑ افراد بیروزگاری الاؤنس کیلئے درخواستیں جمع کراچکے ہیں،اپنے ملازمین کے تحفظ کیلئے امریکی صدر ڈونلڈ ٹرمپ نے امیگریشن پرعارضی پابندی لگانے کا اعلان کردیا ہے،جو دو ماہ کیلئے ہوگی اور اس میں دو بار ایک ایک ماہ کی توسیع دی جاسکے گی،کورونا وائرس سے تباہ معیشت کو بڑا جھٹکا تیل کی قیمت میں گرواٹ سے لگا جو منفی زون میں چلی گئی،امریکی تاریخ میں پہلی بار تیل مفت سے بھی سستا ہوگیا،کمپنیاں ایک بیرل تیل اور اسے گھر لے جانے کیلئے 37ڈالر بھی دینے لگیں،یعنی تیل منفی 37ڈالر تھا جس سے تیل کمپنیوں کو کھربوں ڈالر کا خسارہ ہوا اور تیل کے کنویں بند ہونے لگے،تیل مفت سے بھی نیچے آیا تو امریکی حصص بازار بھی بدترین مندی کا شکار ہوگیا اور فروخت کے رجحان سے مارکیٹ میں افراتفریح پھیل گئی جبکہ سرمایہ کاروں کے کھربوں ڈالر ڈوب گئے،صرف یہی نہیں امریکی حکومت نے اربوں ڈالر کے تین پیکجز بھی متعارف کرائے ہیں جس سے امریکی شہریو ں،چھوٹے کاروبار اورطبی عملے کی مدد کی جائے گی۔