Ilyas 
مصطفی الکاظمی کی کابینہ کی منظوری امریکی انخلاسے متعلق پارلیمنٹ کی قرارداد پر ایکشن سے مشروط،کاظمی نے قراردادپر عملدرآمد کا عہد کیا ہے، سیاسی رہنما
غیر ملکی افواج کی غیر قانونی موجودگی کو ختم کرنے سے متعلق سنجیدہ ہوں، نئی حکومت جلد ہی اس سلسلے میں واشنگٹن کے ساتھ بات چیت کرے گی،مصطفی الکاظمی
بغداد (نیوز ڈیسک) عراق سے امریکی فوج کے انخلا کے عہد پر تمام جماعتوں نے نئے وزیراعظم کی نامزدگی کی توثیق کردی،مصطفی الکاظمی نے امریکا سے انخلا کے معاملے پر جلد بات چیت کی یقین دہانی کرادی، تفصیلات کے مطابق فتح پارٹی سے تعلق رکھنے والے سینئر رکن پارلیمنٹ سعد السعدی نے عراقی ویب سائٹ ٹوڈے نیوز کوبتایا کہ سیاسی جماعتوں نے مصطفی الکاظمی کی کابینہ کی منظوری کو امریکی زیرقیادت غیرملکی فورسز کے انخلاسے متعلق پارلیمنٹ کی قرارداد پر ان کے اقدامات سے مشروط کیا ہے، مصطفیٰ الکاظمی نے پارلیمنٹ کے اعتماد کا ووٹ حاصل کرلیا ہے، اب ان کا سب سے اہم فریضہ پارلیمنٹ کے توثیق شدہ قانون کو نافذ کرنا ہے، جس کی بنیاد پر تمام غیر ملکی افواج کو عراق سے نکالنا چاہئے، یہ شرط ایک انتہائی اہم ترین معاملہ ہے جس پر عمل درآمد کا کاظمی نے عہد کیا ہے،انہوں نے اس شرط پر رضامندی ظاہر کی ہے، قراردادکا حوالہ دیتے ہوئے کہا کہ السعدی نے کہا کہ اس پر عملدرآمد سے کوئی انکار نہیں کرسکتا، عراقی وزیراعظم مصطفی الکاظمی نے غیر ملکی فوج کی کسی بھی غیر قانونی موجودگی کے خاتمے کے عزم کا اظہار کرتے ہوئے کہا ہے کہ نئی حکومت جلد ہی اس سلسلے میں واشنگٹن کے ساتھ بات چیت کرے گی، عراق کی ٹوڈے نیوز ویب سائٹ سے انٹرویو میں مصطفی الکاظمی نے کہا کہ وہ عراق میں غیر ملکی افواج کی غیر قانونی موجودگی کو ختم کرنے کے بارے میں "سنجیدہ” ہیں،تنازعات حل کرنے کے لئے کسی کو بھی عراقی سرزمین کو میدان کے طور پر استعمال نہیں کرنا چاہئے، انہوں نے زور دے کر مزید کہا کہ وہ غیرملکی اور عرب اسلامی دنیا کے مشترکہ مفادات کے اصول پر مبنی کھلی پالیسی پر عمل پیرا ہوں گے، سرمایہ کاری کو راغب کرنے اور تیل پر منحصر معیشت کو تنوع بخشنے کے لئے کشیدگی کا خاتمہ ضروری ہے۔
