جنرل سلیمانی نہ ہوتے تو عراق پرداعش کا قبضہ ہوتا،کرد رہنما

شہیدسلیمانی نے کرد فورس کے ساتھ مل کر داعش کو بھاگنے پر مجبور کیا، محمد حاج محمود
بغداد(نیوز ڈیسک)عراقی کردستان میں سوشلسٹ ڈیموکریٹک پارٹی کے سربراہ محمد حاج محمود نے کہا ہے کہ جنرل قاسم سلیمانی جیسے عظیم کمانڈر نہ ہوتے تو آج بغداد سمیت پورے عراق پر داعش کا قبضہ ہوتا، ایک انٹرویو میں انہوں نے کہاکہ شہید جنرل قاسم سلیمانی جنگی میدان میں نہایت مہارت رکھتے تھے وہ نڈر اور شجاع تھے،عراق کے حالات سے اچھی طرح واقف تھے، انہوں نے کہا کہ تکفیری دہشت گردوں نے اچانک کردستان پر حملہ کیااور چند دنوں میں وہ کرکوک، مخموراور گویر تک پہنچ گئے، اس وقت شہید جنرل سلیمانی 70 فوجی اہلکاروں کے ساتھ کردستان پہنچ گئے اور داعش کے خلاف جوابی کارروائی کا آغاز کیااور کرد پیشمرگہ فورس کے ساتھ مل کر داعش کو راہ فرار اختیار کرنے پر مجبور کیا۔