اسلامی اقدار پامال کرنے والی این جی اوز پر پابندی لگائی جائے، وفاق المدارس الشیعہ

میرا جسم میری مرضی کا نعرہ گمراہ کن،جسم انسان کی ملکیت نہیں،علامہ نیاز نقوی
لاہور ( پ ر) وفاق المدارس الشیعہ پاکستان کے نائب صدرعلامہ سید نیاز حسین نقوی نے کہا ہے کہ اسلام شرافت، حیا اور عفت کا دین ہے،میرا جسم میری مرضی کا گمراہ کن نعرہ کسی بھی لحاظ سے درست نہیں،جسم یا اس کا کوئی بھی حصہ انسان کی ملکیت ہی نہیں،بلکہ یہ اللہ تعالی کی امانت ہے، اسی بنا پرخود آزاری اور خودکشی سنگین جرم اورحرام ہے۔ جیسے آدمی اپنی مرضی سے پاؤں کی انگلی کا کوئی حصہ بھی کاٹنے کا حق نہیں رکھتا۔ اسی طرح پورا جسم فقط اللہ تعالیٰ کی اطاعت میں استعمال کے لئے دیا گیا ہے،ا نہوں نے کہا کہ مسیحی راہباؤں کا حجاب، پردے کی فطری ضرورت ہونے کا ثبوت ہے۔ فحاشی و عریانی کی دین میں کوئی گنجائش نہیں۔مغربی عورت آج اس مادر پدر آزادی سے پریشان ہے۔ان کا کہنا تھا کہ عورت کو جس قدر حقوق، تحفظ اور اطمینان اسلام نے دیا ہے کسی دین نے نہیں دیا۔علامہ نیاز نقوی نے مطالبہ کیا کہ حکومت بے حیائی، بے راہروی اور مشرقی اور اسلامی اقدار پامال کرنے والی این جی اوز پر پابندی عائد کرے۔