الگ رویت ہلال کمیٹی تشکیل نہیں دی، وفاق المدارس الشیعہ

 علمائے کرام اور مومنین سے چاند نظر آنے کی اطلاع دینے کی خواہش کی گئی تھی
 لاہور (نیوز ڈیسک)وفاق المدارس الشیعہ نے عیدالفطر کا چاند دیکھنے کیلئے الگ رویت ہلال کمیٹی تشکیل دینے کی تردید کردی اور واضح کیا کہ 9 مئی کو ادارہ کے سیکرٹری جنرل مولانا محمد افضل حیدری کی طرف سے علمائے کرام اور مومنین کے نام جاری کردہ خط میں چاند نظر آنے کی اطلاع دینے کی خواہش کی گئی تھی، یہ خط وفاق المدارس اور جامعہ المنتظر کی ویب سائٹ اور سوشل میڈیا پر موجود ہے، جس میں کسی علیحدہ کمیٹی بنانے کا اشارہ تک نہیں، اعلامیہ میں بھی واضح کیا گیا ہے کہ وفاق المدارس الشیعہ پاکستان کے صدر علامہ حافظ سید ریاض حسین نجفی کی طرف سے گذشتہ ماہ مرکزی رویتِ ہلال کمیٹی کے چیئرمین مولانا عبدالخبیر آزاد کے نام خیر سگالی خط میں شرعی ضابطوں اور وحدت کے تقاضوں کے مطابق چاند کے اعلان کی خواہش کی گئی تھی۔