کالعدم تحریک لبیک نے جو کیا وہ اسلام کی خدمت نہیں، علامہ افتخار نقوی

یہ انداز اور رویہ نہ اسلامی ہے، نہ انسانی اور نہ حضور کے ساتھ عشق کا تقاضہ ہے
لاہور(نیوز ڈیسک)معروف عالم دین علامہ افتخار حسین نقوی کا کہنا ہے کہ اسلام دین محبت ہے، ایک مذہبی جماعت کا انداز اور رویہ نہ اسلامی ہے اور نہ ہی حضور کے ساتھ عشق کا تقاضہ ہے، اس گروپ کا ردعمل فساد ہے، دین کی خدمت نہیں، ملک بھر میں جاری کالعدم تحریک لبیک کے احتجاج اور دھرنوں پر علامہ افتخار حسین نقوی نے شدید مذمت کرتے ہوئے کہا کہ جس طرح کالعدم تحریک لبیک کے کارکنوں کی جانب سے اس معاملے پر احتجاج کیا گیا اور جلوس نکالے گئے، کچھ نہتے افراد قتل ہوئے اور شہید ہوئے، سرکاری املاک کو نقصان پہنچایا گیا، یہ انداز اور رویہ نہ اسلامی ہے، نہ انسانی اور نہ حضور کے ساتھ عشق کا تقاضہ ہے ، علامہ افتخار حسین نقوی نے مزید کہا کہ فرانس کے صدر نے گستاخانہ انداز اپنایا ہے، یہ انتہائی قابل مذمت ہے، مگر اس معاملے پر وزیراعظم نے بہترین حکمت عملی سے عالم اسلام کو جھنجوڑا ہے