مصنوعات نہ خریدنے پر امریکا کی چین کو دھمکیاں

چین نے وعدوں کا پاس نہ کیا تو عالمی معیشت پر سنگین اثرات پڑیں گے،امریکا
واشنگٹن (نیوز ڈیسک) امریکی وزیر خزانہ اسٹیفن منوچن نے امید ظاہر کی ہے کہ چین جنوری میں طے کئے گئے تجارتی معاہدے کے تحت امریکی مصنوعات خریدنے کے اپنے وعدوں کا احترام کرے گا، انہوں نے خبردار کیا کہ اگر چین نے اپنے وعدے پورے نہ کیے اور معاہدے کا احترام نہ کیا تو بیجنگ کو اس کی بھاری قیمت چکانا پڑ سکتی ہے، فاکس نیوز بزنس سے انٹرویو میں اسٹیفن منوچن نے کہا کہ مجھے لگتا ہے کہ چین اپنے وعدوں کا احترام کرے گا، معاہدے پر طویل عرصے سے بات چیت کی جارہی ہے، چینی صدر شی جن پنگ اور امریکی صدر ڈونلڈ ٹرمپ نے اس پر دستخط کیے، میرے پاس اس معاہدے پرعمل درآمد پر یقین کی ٹھوس وجہ ہے۔ مجھے یقین ہے کہ چینی اس معاہدے کا احترام کریں گے ،اگر چین ایسا نہیں کرتا تو پھر ہمارے تعلقات اور عالمی معیشت پر بہت سنگین اثرات پڑیں گے۔