برطانیہ کو انسانیت کیخلاف جرائم کے مقدمہ کے سامنا

چاگوس جزائر واپس نہ کرنے پر انٹرنیشنل کرمنل کورٹ جائیں گے،موریشس
لندن (نیوز ڈیسک)برطانیہ کو موریشس کے چاگوس جزائر واپس نہ کرنے پر انسانیت کے خلاف جرائم کے مقدمہ کا سامنا ہے،ان جزائر پر برطانیہ نے 50سال پہلے قبضہ کرکے مقامی افراد کو بیدخل کردیا تھااور یہاں امریکی فوجی اڈہ بنایا گیا، جنوری 2019میں عالمی عدالت انصاف نے برطانیہ کو حکم دیا تھا کہ 6ماہ میں چاگوس جزائر موریشس کے حوالے کر دیے جائیں تاکہ ان سے نوآبادیات کے خاتمے کو مکمل کیا جا سکے لیکن برطانیہ نے اس پر عملدرآمد سے مسلسل انکار کیا ہے،برطانیہ کا کہنا ہے کہ جب ان جزائر کی دفاعی ضرورت نہیں رہے گی تو انھیں موریشس کو لوٹا دیا جائے گا،موریشس کے وزیرِ اعظم پرویند جگناتھ نے برطانیہ کے رویے کو ہٹ دھرمی اور شرمناک قرار دیتے ہوئے کہا ہے کہ برطانیہ نے اقوامِ متحدہ کی اعلیٰ ترین عدالت کے فیصلے کے باوجود چاگوس جزائر کے افراد کو اپنے گھر واپس جانے کی اجازت نہ دے کر ’انسانیت کے خلاف جرائم‘ کا ارتکاب کیا ہے اور وہ برطانوی حکام کے خلاف انٹرنیشنل کرمنل کورٹ (آئی سی سی) میں انسانیت کے خلاف جرائم کے الزامات عائد کرنے کے امکانات پر غور کر رہے ہیں۔