امریکی قیادت کو سیاسی وائرس لگ گیا،چینی وزیر خارجہ

امریکی سیاستدان جھوٹ گھڑ رہے ہیں تاکہ چین کو نشانہ بنایا جا سکے
بیجنگ (نیوزڈیسک) چین کے وزیر خارجہ وانگ ڑئی نے امریکا کی جانب سے چین پر کورونا وائرس کو پھیلانے کے الزامات کو جھوٹ قرار دیتے ہوئے کہا ہے کہ امریکا چین سے باہمی تعلقات کو سرد جنگ کی طرف دھکیل رہا ہے، امریکا میں کچھ سیاسی شخصیات کورونا وائرس کو چین کا نام دے کر اس پر سیاست کر رہے ہیں تاکہ چین کا نام داغ دار کیا جا سکے،امریکی قیادت کو سیاسی وائرس لگ گیا ہے جو انہیں چین پر تنقید کرنے پر مجبور کرتا رہتا ہے،بیجنگ میں نیوز کانفرس کے دوران چینی وزیرخارجہ نے پیشکش کی کہ چین کورونا وائرس کے بارے میں تحقیقات کرنے میں مکمل تعاون کے لیے تیار ہے لیکن یہ تحقیقات چین کو بدنام کرنے کے لیے سیاسی مداخلت سے پاک ہونی چاہیں انہوں نے کہا کہ چین کے مشاہدے میں آیا ہے کہ امریکا میں کچھ سیاسی قوتوں نے امریکا چین تعلقات کو یرغمال بنا رکھا ہے اور دونوں ملکوں کو سرد جنگ کی طرف دھکیل رہے ہیں،چینی وزیر خارجہ نے کہا کہ تحقیقات کسی کو پہلے سے مجرم گردان کر نہیں کی جانی چاہیں، کورونا وائرس سے ہونے والی تباہی سے قطع نظر امریکا میں سیاسی وائرس پھیل رہا ہے۔ اس سیاسی وائرس میں چین پر تنقید کرنے اور بدنام کرنے کے ہر موقعے سے فائدہ اٹھانا مقصد ہے اور کچھ سیاست دان بنیادی حقائق کو مکمل طور پر نظر انداز کر کے بہت سے جھوٹ گھڑ رہے ہیں تاکہ چین کو نشانہ بنایا جا سکے۔