Ilyas 
بنیادی حقوق کا حصول اتحاد کے بغیر ممکن نہیں، جلد ہی جی بی کے عوام کو ایک بیانیہ پر لا کر اپنے حقوق کیلئے جدوجہد کو تیز کیا جائے گا،شہید ضیاالدینؒ کی برسی پر خطاب
گلگت بلتستان اسمبلی لینڈ ریونیو ایکٹ بل پاس کرنے سے باز رہے،شیخ مرزا علی، شہید ضیاؒ کیس میں نامزد ملزمان کو گرفتار کرکے قرار واقعی سزا دی جائے، شیخ نیئر عباس
گلگت (نیوز ڈیسک) ایم ڈبلیو ایم گلگت بلتستان کے سیکریٹری جنرل سید علی رضوی نے کہا کہ ملک عزیز پاکستان کی سالمیت اور بقا اتحاد و وحدت میں مضمر ہے، عالمی استعماری طاقتوں کی سازشوں کا مقابلہ سنی شیعہ اتحاد ہی کے ذریعے ممکن ہے،گلگت بلتستان کے تمام تر بنیادی حقوق کا حصول اتحاد کے بغیر ممکن نہیں، گلگت بلتستان کے حقوق کے نام پر نام نہاد آرڈرز کو یہاں کے عوام نے مسترد کر دیا ہے، ان خیالات کا اظہارانہوں نے مرکزی امامیہ کونسل گلگت بلتستان کے زیر اہتمام شہید سید ضیا الدین رضویؒ اور ان کے رفقا کی 15 ویں برسی کے موقع پر جامع امامیہ مسجد گلگت میں تعزیتی اجتماع سے خطاب میں کیا،انہوں نے کہا کہ وفاقی حکمران گلگت بلتستان کے عوام سے قطعاً مخلص نہیں، اگر حکمران یہاں کے عوام سے مخلص ہوتے تو عوامی خواہشات کو پیش نظر رکھ کر گلگت بلتستان کے لئے بااختیار سیلف گورننس کیلئے قانون سازی کرتے، جی بی اب کسی آرڈر کا متحمل نہیں ہوسکتا، جلد ہی جی بی کے عوام کو ایک بیانیہ پر لا کر اپنے حقوق کیلئے جدوجہد کو تیز کیا جائے گا،انہوں نے گلگت بلتستان کے مقامی اداروں سمیت دیگر اداروں میں میرٹ کی پامالی کو انسانی معاشرے کی بربادی قرار دیا اور حکومت و عوام سے اپیل کی کہ وہ میرٹ کو یقینی بنا کر اپنے معاشرے کو تباہی سے بچائیں،اسلامی تحریک گلگت بلتستان کے سیکریٹری جنرل و امام جمعہ والجماعت دنیور شیخ مرزا علی نے کہا کہ جی بی کو آرڈر پر چلانے کا سلسلہ بند ہونا چاہیئے، وفاقی حکمرانوں سے جی بی کے عوام پوچھیں کہ وہ عوام کو کیا دے سکتے ہیں، پھر اپنے ووٹ دینے کا انتخاب کریں، جی بی کی زمینوں کے مالک یہاں کے عوام اور باسی ہیں، خالصہ سرکار کا قانون غیر آئینی، غیر قانونی، غیر شرعی اور انسانی حقوق کی خلاف ورزی ہے، گلگت بلتستان اسمبلی لینڈ ریونیو ایکٹ بل کو پاس کرنے سے باز رہے، اگر یہ قانون اسمبلی سے پاس ہوا تو وہ دن جی بی کی تاریخ کا مایوس ترین دن ہوگا، شیخ نیئر عباس مصطفوی نے کہا کہ شہید آغا ضیا الدین رضویؒ کے کیس میں نامزد ملزمان کو گرفتار کرکے قرار واقعی سزا دی جائے اور نصاب تعلیم کے مطالبے کو حل کیا جائے، متنازعہ مواد نصاب تعلیم سے ہٹایا جائے، امام جمعہ والجماعت ہنزہ شیخ موسیٰ کریمی و دیگر نے بھی تعزیتی اجتماع سے خطاب کیا، اجتماع کے آخر میں متفقہ طور پر قرارداد منظوری کی گئی، جس میں کہا گیا کہ شہید سید ضیا الدین رضویؒ قتل کیس کی فائل کو بند کرنے کی مذمت کرتے ہیں اور وفاقی حکومت سے مطالبہ کرتے ہیں کہ اس کیس کی ازسرنو تحقیقات کرکے اصل قاتلوں اور سازش کاروں کو بے نقاب کیا جائے۔
