لاپتہ افراد کی بازیابی کیلئے ملتان میں احتجاجی ریلی اور دھرنا

 وعدوں کو عملی شکل میں دیکھنا چاہتے ہیں، تسلیوں سے کام نہیں چلے گا
ملتان (نیوز ڈیسک) جوائنٹ ایکشن کمیٹی فار شیعہ مسنگ پرسنز کے زیر اہتمام لاپتہ افراد کی بازیابی کیلئے ملتان میں نماز جمعہ کے بعد جامع مسجد الحسین ؑسے گلشن مارکیٹ تک احتجاجی ریلی نکالی گئی، ریلی کے شرکا نے گلشن مارکیٹ پہنچ کر احتجاجی علامتی دھرنا دیا ،دھرنے کی قیادت مجلس وحدت مسلمین جنوبی پنجاب کے سیکریٹری جنرل علامہ اقتدار حسین نقوی، علامہ قاضی نادر حسین علوی اور دیگر علما نے کی، مقررین نے حکومت سے مطالبہ کیا کہ مسنگ پرسنز کی فیملیز سے مانگا گیا وقت ختم ہو چکا ہے، لاپتا افراد کی بازیابی کو یقینی بنایا جائے، جبری گمشدگی کے شکار آخری فرد کی رہائی تک احتجاج جاری رہے گا،جب تک ہمارے پیاروں کو بازیاب نہیں کیا جاتا تب تک مزار قائد پر دھرنا ختم نہیں ہو گا،حکومتی وعدوں کو عملی شکل میں دیکھنا چاہتے ہیں،محض طفل تسلیوں سے اب کام نہیں چلے گا۔