فرقہ پرست گروہ کو لگام ڈالی جائے ،امامیہ کونسل گلگت

نلتر واقعہ کو دشمنی قرار دینے کے باوجود شیعہ سنی اتحاد کو نقصان پہنچایا جارہاہے
گلگت (پ ر) مرکزی امامیہ کونسل کے زیر اہتمام ملی تنظیموں کا اجلاس مرکزی امامیہ جامع مسجد گلگت میں منعقد ہوا اجلاس میں گلگت کی مخدوش صورت حال پر تحفظات کا اظہار کرتے ہوئے صوبائی حکومت سے اپنی رٹ قائم کرنے کا مطالبہ کیا گیا، اجلاس میں کہا گیا کہ انتظامیہ کی جانب سے نلتر واقعے کو ذاتی دشمنی قراد دینے کے باوجود چند شر پسند عناصر کی طرف سے شیعہ سنی اتحاد کو نقصان پہنچانے کیلئے پے در پے واقعات سِخت تشویشناک ہیں،شرپسندوں کو علاقے کی تعمیر و ترقی ہضم نہیں ہو رہی ہے ، شتیال سے لیکر گلگت تک کھلے عام اسلحہ کی نمائش،کفر کے فتوے،کافر کافر کی نعرہ بازی اور شر انگیز تقاریر کے ذریعے اشتعال انگیزی اور فرقہ واریت کو ہوا دینے کی بھرپور کوشش کی گئی لیکن آغاسید راحت حسین الحسینی، علمائے کرام اورامامیہ کونسل کے با بصیرت قائدین نے انتہائی صبر و تحمل اور بردباری سے شرپسندوں کے پلان کو خاک میں ملایا ، امامیہ جامع مسجد کے گیٹ کے سامنے راہگیر پر فائرنگ اور گھڑی باغ میں دنیور کی سوزوکی پر حملہ جس کے نتیجے میں دو افراد ذِخمی ہوئے اسی گروہ کی کارستانیاں ہیں اس گروہ کو بروقت لگام نہ دیا گیا تو علاقہ کا امن تہہ و بالا ہو جائے گا