حضرت عیسیٰ ؑ نے ہمیں فروتنی اور سادگی کا پیغام دیا، پوپ

کسی کو غریبوں کا خیال نہیں،کہ کرسمس کو مادیت پرستوں نے ہائی جیک کر لیا
ویٹیکن سٹی (نیوزڈیسک)رومن کیتھولک مسیحی برادری کے روحانی پیشوا پوپ فرانسس نے کہا ہے کہ خدا ہم سب سے محبت کرتا ہے، چاہے وہ کتنا ہی بْرا کیوں نہ ہو، وہ ویٹی کن سٹی میں کرسمس کے موقع پر ہزاروں افراد کے مجمع سے خطاب کر رہے تھے، پوپ فرانسس نے کہا کہ ہو سکتا ہے کہ آپ کے خیالات میں غلطی ہو، ہو سکتا ہے کہ آپ نے چیزوں کو بالکل خراب کر دیا ہو، لیکن خدا پھر بھی آپ سے محبت کرتا رہا ہے، اُنہوں نے کہا کہ کرسمس کو مادیت پرستوں نے ہائی جیک کر رکھا ہے اور غربت کے ماروں، جنگ متاثرین اور پناہ گزینوں کی صورتحال پر کوئی توجہ نہیں دی جارہی،لوگوں کو اس بات پر توجہ دینا چاہیے کہ حضرت عیسی علیہ السلام نے ہمیں فروتنی اور سادگی کا پیغام دیا ہے، جشن مناتے وقت ہمیں ان بچوں کے بارے میں بھی سوچنا چاہیے جو جنگ اور غربت کی وجہ سے چین کی نیند بھی نہیں سوپاتے،کسی کو ان بچوں کی بھوک مٹانے کی فکر نہیں بلکہ کھلونوں کے بجائے ان کے ہاتھوں میں ہتھیار تھمائے جارہے ہیں،انہوں نے لوگوں سے اپیل کی ہے کہ وہ کھانا کھاتے وقت سیل فون کا استعمال ترک کر دیں اور ایک دوسرے سے بات کریں۔