جامعہ عروة الوثقی میں جدید لائبریری مکتبہ الکتاب مبین کا افتتاح

ہم نے امت کو فرقہ واریت سے نکال کر جسد واحد بنانا ہے، علامہ جواد نقوی
لاہور(نیوز ڈیسک) جامعہ عروة الوثقی میں دورِ حاضر کے جدید تقاضوں کے عین مطابق لائبریری ”مکتبہ الکتاب مبین“ کا افتتاح کر دیا گیا، افتتاحی تقریب کی صدارت تحریک بیداری امت مصطفیٰ کے سربراہ علامہ سید جواد نقوی نے کی، جبکہ تحریک منہاج القران کی سپریم کونسل کے سربراہ ڈاکٹر حسین محی الدین سمیت مختلف مکاتب فکر کے جید علمائے کرام، مشائخ عظام سمیت مفکرین اور دانشور حضرات کی کثیر تعداد نے شرکت کی، مقررین نے اپنے خطابات میں علامہ سید جواد نقوی کی اس شاندار کاوش کو سراہا، مقررین نے کہا کہ علامہ سید جواد نقوی پاکستان میں امن کے حقیقی سفیر اور ترجمان ہیں ، جو وحدت امت کیلئے کوشاں ہیں ، علامہ سید جواد نقوی کا کہنا تھا کہ کتاب سے رشتہ جوڑ کر ہی اپنی دنیا و آخرت کو سنوارا جا سکتا ہے، انہوں نے کہا کہ ہم نے لاہور کے مرکز میں ایک جدید ترین لائبریری کا اضافہ کیا ہے جس میں دو لاکھ سے زائد کتب ہیں جبکہ اسے انفارمیشن ٹیکنالوجی سے بھی مزین کیا گیا ہے، انہوں نے کہا کہ پاکستان میں فرقہ واریت نے بہت زیادہ نقصان کیا، اسی فرقہ واریت سے امت گروہ در گروہ تقسیم ہوتی گئی، مگر ہم نے امت کو فرقہ واریت سے نکال کر جسد واحد بنانا ہے اور اس میں احساس پیدا کرنا ہے کہ امت کے افراد اپنے بھائیوں کا احساس جسد واحد کی مانند کریں۔