تہران: اس سال "عالمی وحدت اسلامی کانفرنس” آن لائن منعقد ہوگی

تہران(نیوز ڈیسک) عالمی تقریب مذاہب اسلامی فورم کے سربراہ نے کہا ہے کہ اس سال 34 ویں بین الاقوامی وحدت اسلامی کانفرنس آن لائن ورچوئل منعقد ہو گی۔ فورم کے سربراہ حمید شہریاری نے صحافیوں سے گفتگو کرتے ہوئے کہا کہ اس سال عالمی وحدت اسلامی کانفرنس 29 اکتوبر سے 3 نومبر تک ویڈیو کانفرنس کی صورت میں منعقد ہو گی جس میں دنیا کی 200 سے زائد غیر ملکی شخصیات اتحاد و وحدت، تہذیب و ثقافت، عالمی اور علاقائی مسائل، مسلمانوں کو درپیش مسائل و مشکلات اور عالم اسلام کے خلاف ہونے والی سازشوں کے موضوع پر خطاب کریں گی۔ یاد رہے کہ بانی انقلاب اسلامی امام خمینی (رح) نے بارہ سے سترہ ربیع الاول کے ایام کو ہفتہ وحدت قرار دیا تھا جس کا مقصد مسلم امہ کے درمیان اتحاد و یکجہتی کو فروغ دے کر دشمنان اسلام کی شازشوں اور ریشہ دوانیوں کو ناکام بنانا ہے