تارکین وطن کو سیاسی مسئلہ بنانے پر ترکی پر چڑھائی

ترکی بلیک میلنگ کیلئے تارکین وطن کا استحصال کررہا ہے،جرمنی،فرانس
برلن (نیوز ڈیسک) جرمنی اور فرانس نے تارکین وطن کو سیاسی مسئلہ بنانے پر ترکی کو آڑے ہاتھوں لیا ہے،جرمن چانسلر اینگلا مرکل نے ترک صدر رجب طیب اردوان پر زور دیا کہ وہ اپنی ناراضی کے اظہار کیلئے پناہ گزینوں کو استعمال نہ کریں یہ درست ہے کہ ترکی کو ادلب کے حوالے سے بڑے چیلنج کا سامنا ہے مگر یورپی یونین کے ساتھ بات چیت میں اس طرح ناراضی کا اظہار اور پناہ گزینوں کے معاملے کا استحصال کسی طور قبول نہیں کیا جا سکتا، یہ آگے بڑھنے کا طریقہ نہیں،فرانسیسی وزیر خارجہ ژاں یوس لی ڈاریان نے ترکی پر الزام لگایا ہے کہ وہ یورپ کو بلیک میل کرنے کے لیے تارکین وطن کا استحصال کررہا ہے، ترکی کو اپنی سرزمین پر مہاجرین سے نمٹنے کے سلسلے میں یورپی یونین کے ساتھ اپنے معاہدے کا احترام کرنا چاہئے، یورپ کو دباؤ ڈالنے اور بلیک میل کرنے کیلئے ترکی کا تارکین وطن کارڈ کا استعمال قطعی ناقابل قبول ہے۔