باجماعت نماز، جمعہ اور تراویح کی مشروط اجازت

حکومت اور علما میں مذاکرات،20نکاتی متفقہ اعلامیہ جاری کردیا گیا
اسلام آباد (نیو زڈیسک) مساجد میں باجماعت نماز، جمعہ اور تراویح کی مشروط اجازت دیدی گئی، صدر مملکت ڈاکٹر عارف علوی کی زیر صدارت علماکرام اور مشائخ کے اجلاس میں کورونا وائرس کی موجودہ صورتحال کے تنا ظر میں رمضان المبارک کے دوران نماز تراویح اور نماز جمعہ سے متعلق 20 نکاتی متفقہ اعلامیہ جاری کردیا گیا،اعلامیہ کے مطابق نماز کیلئے صفوں اور نمازیوں کے درمیان 6فٹ کا فاصلہ رکھا جائے گا، 50 سال سے بڑوں اور بچوں کو مساجد میں داخلے کی اجازت نہیں ہوگی، نمازی ایک دوسرے سے ہاتھ ملائیں گے نہ گلے ملیں گے، دریاں، قالین نہیں بچھائے جائیں گے،جو لوگ گھر سے اپنی جائے نماز لا کر اس پر نماز پڑھنا چاہیں، وہ ایسا ضرور کریں،ہر نماز سے پہلے فرش کلورین سے دھویا جائے گا، نمازی لگے ہوئے نشانات پر کھڑے ہونگے، نماز مسجد کے احاطے میں ہوگی، سڑکوں اور فٹ پاتھ پر نہیں، شرائط پوری نہ ہونے پر حکومت کارروائی کرسکے گی، نمازی وضو گھر سے کرکے اور ماسک لگاکر آئینگے، نزلہ زکام کا مریض مسجد نہیں آسکے گا، نماز سے پیشتر اور بعد میں مجمع لگانے سے گریز کیا جائے،مسجد اور امام بارگاہ میں افطار اورسحر کا اجتماعی انتظام نہ کیا جائے۔