آیت اللہ خامنہ ای کا بیان عالم اسلام کی سرپرستی کی واضح دلیل ہے

مسلم کشی نہ روکی تو بھارت مسلم دنیا میں تنہا رہ جائے گا، علامہ سید ساجد علی نقوی
لاہور(نیوز ڈیسک) شیعہ علما کونسل پاکستان کے سربراہ علامہ سید ساجد علی نقوی نے ولی امر مسلمین آیت اللہ سید علی خامنہ ای اور اہل بیت ورلڈ اسمبلی کی جانب سے بھارتی مسلمانوں پر مظالم کے مذمتی بیان کی تائید اور خیرمقدم کرتے ہوئے اسے بھارتی مسلمانوں کے ساتھ اظہار یکجہتی کا موثر پیغام قرار دیا،انہوں نے کہاکہ کوئی بھی مہذب معاشرہ یا ملک ایسے ظلم و ستم کی حمایت نہیں کرتا، مغربی دنیا اور مسلمان ممالک کو نہتے بھارتی مسلمانوں کے لئے اقدامات کرنے کی ضرورت ہے، آیت اللہ خامنہ ای کا بیان عالم اسلام کی سرپرستی کی واضح دلیل ہے ان کا مزید کہنا تھا کہ بھارتی حکومت کو چاہیئے کہ وہ انتہا پسندوں اور ان کی جماعتوں کا محاسبہ کرے، مسلمانوں کے قتل عام کو نہ روکا گیا تو عالم اسلام میں بھارت تنہا رہ جائے گا۔