علامہ راجہ ناصرعباس کی وزیراعظم کی زیرصدارت اجلاس میں شرکت

اجتماعی عبادات کیلئے حکومتی اقدامات کی حمایت، زائرین کے مسائل کی نشاندہی
لاہور(نیوزڈیسک) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے وزیر اعظم عمران خان سے ملاقات میں کہا ہے کہ ماہ رمضان میں حکومت کی طرف سے عبادات و مذہبی رسومات کی ادائیگی کے لیے جو سہولیات دی جا رہی ہیں وہ عوام کے مذہبی جذبات کی بلاشبہ ترجمانی کرتی ہے تاہم اس فیصلے کو تب ہی حوصلہ افزا قرار دیا جا سکتا ہے جب عوام کی جانب سے ذمہ داری کا مظاہرہ کرتے ہوئے احتیاطی تدابیر پر سختی سے عمل کیا جائے گا،انہوں نے کہا کہ جن ممالک میں کورونا وائرس سے بچاؤ کی احتیاطی تدابیر پر عمل نہیں کیا گیا آج پوری قوم کو وہاں بھیانک صورتحال کا سامنا ہے ملاقات میں زائرین کے مسائل پر علامہ راجہ ناصر عباس جعفری نے کہا کہ قرنطینہ سینٹرز میں طے شدہ قواعد و ضوابط پر عمل داری کو یقینی بنایا جائے،ڈیرہ غازی خان،ملتان اور بہاولپور میں بیشتر زائرین پینتالیس دن سے زائد عرصہ گزرنے کے باوجود ابھی تک قرنطینہ سینٹرز میں ہیں،جس پر وزیر اعظم نے فوری اقدامات کی یقین دہانی کرائی۔