دہشت گردی کی بیخ کنی کیلئے انتہا پسند عناصر کی بیخ کنی ضروری ہے، علامہ ناصر عباس

کالعدم تنظیموں کے ٹھکانے ختم کئے بغیر امن محض خواب ہوگا
اسلام آباد(نیوز ڈیسک) مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے بلوچستان کے علاقے ہرنائی میں ایف سی کی پوسٹ پر دہشت گردوں کے حملے کی شدید مذمت کرتے ہوئے کہا ہے کہ ملک دشمن طاقتین اپنی بزدلانہ کاروائیوں سے ملک کے امن و سکون کو تباہ کرنا چاہتی ہیں،بھارتی خفیہ ایجنسی را اپنے آلہ کاروں کے ذریعے جن مذموم عزائم کی تکمیل چاہتی ہے اس میں وہ کامیاب نہیں ہو گی ، بلوچستان میں شدت پسند تنظیموں کی بیرونی معاونت کے ٹھوس شواہد موجود ہیں، کالعدم جماعتوں کی کمین گاہوں کے مکمل تدارک کے بغیر امن و امان کا قیام محض ایک خواب ہے، دہشت گردی کی بیخ کنی کے لیے انتہا پسند عناصر کی بیخ کنی ضروری ہے، ملک دشمنوں کے خلاف بلوچستان میں کارروائیاں تیز کرنا ہو گی،ان عناصر کوقانون کے شکنجے میں لانا انتہائی ضروری ہے جو مذہب و مسلک کا نام استعمال کر کے اور کبھی محرومیوں کا رونا رو کر معصوم افراد کو ملک اور قوم کے خلاف دشمنی پر اکساتے ہیں