امریکا میں کورونا اور جرائم دونوں میں اضافہ

واشنگٹن (نیوزڈیسک)امریکا میں لمحہ بہ لمحہ کورونا وائرس سے متاثرین اور ہلاکتوں میں اضافے کے ساتھ ساتھ جرائم میں بھی اضافے کی خبریں ہیں۔ کورونا وائرس سے امریکا کی نیویارک ریاست سب سے زیادہ متاثر ہے۔ نیویارک شہر میں اب تک دو ہزار دو سو پچاس سے زائد افراد جانبحق ہو چکے ہیں۔نیویارک کے گورنر نے خبردار کیا ہے کہ ریاست میں وینٹیلیٹر مشینوں کی شدید قلت ہے۔ امریکی میڈیا رپورٹوں کے مطابق نیویارک میں کورونا وائرس سے متاثرین اور اموات میں اضافے کے ساتھ ہی قتل اور چوری کی وارداتوں میں بھی اضافہ ہو گیا ہے۔اسی کے ساتھ وائٹ ہاؤس نے وسکانسن اور نبراسکا سمیت مختلف ریاستوں کی حالت المناک بتائی ہے۔ وائٹ ہاؤس کا کہنا ہے کہ ان ریاستوں کو فوری طور پر فیڈرل امداد کی ضرورت ہے۔امریکی روز نامہ واشنگٹن پوسٹ کے مطابق ملک میں کورونا وائرس سے مرنے والوں کی صحیح تعداد اس سے کہیں زیادہ ہے جس کا اعلان کیا گیا ہے۔کورونا وائرس میں مبتلا افراد کی تعداد کے لحاظ سے امریکا پہلے نمبر پر ہے۔